Целулитот се појавува заради промени на сврзното и поткожното масно ткиво, односно како резултат на акумулација на масти, токсини и вода. Оттука, целулитот може да се појави кај било кого, независно дали тој или таа има нормална или прекумерна тежина.

„Кај жените целулитот е за 30% поприсутен отколку кај мажите.“

Целулитот се манифестира со изглед на кора од портокал и почесто се појавува кај жените, отколку мажите и тоа на делови како што се стомакот, бутовите и задникот. Кај жените е поголема веројатноста од појава на целулит заради тоа што поткожното масно ткиво кое генерално е виновно за појавата на целулитот, кај жените е присутно за 30% повеќе отколку кај мажите.

Други причини коишто може да предизвикаат појава на целулит се:

  • Лоша исхрана;
  • Брза диета;
  • Бавен метаболизам;
  • Недостаток на физичка активност;
  • Хормонски промени;
  • Дехидратација;
  • Дебелина и боја на кожата.

Начини за намалување на целулитот

Криолиполиза

Криолиполизата е неинвазивна процедура којашто ги замрзнува и ги убива масните клетки. Откако клетките ќе изумрат телото природно ги отстранува. Овој третман обично се користи за обликување на телото, но отстранувањето на мастите, исто така, може да го намали целулитот.

Ласерски третмани

Ласерските третмани кои обично вклучуваат масажа, липосукција или светлосна терапија може да покажат добри резултати кај проблематичните делови. Тие може да помогнат во разградување на мастите, зголемување на колагенскиот раст и затегнување на кожата, зголемување на протокот на крв и намалување на вишокот задржани течности.

Масажи

Повеќето опции за масажи се засноваат на идејата дека масирањето на проблематичната област ќе го зголеми протокот на крв и ќе го намали вишокот течности. Ендермологија, позната и како липомасажа, е специфичен тип на механичка масажа којашто се изведува со машина којашто со вшмукување со низок притисок ја масира кожата помеѓу два ролери. Повеќето истражувања покажуваат дека техниките на масажа, вклучувајќи ја и ендермологијата, може да ја направат кожата да изгледа подобро во пократки временски рамки, но не нуди долгорочно подобрување.

Терапија со ударни бранови

Ова е ниско-енергетска верзија на технологијата која ги третира бубрежните камења. Тоа е неинвазивен третман кој се прави двапати неделно во период од шест или повеќе недели.

Намалување на мастите и зголемување на мускулната маса

Генерално, независно од тежината, кај секого може да се појави целулитот. Но кај луѓето со прекумерна тежина, најефективниот третман е најпрво да се намалат вишокот килограми. Тренинзите со кардио-вежби и тежини може да помогнат да се подобри изгледот на деловите на коишто вообичаено може да се појави целулитот.

Креми и лосиони

Постојат различни антицелулитни креми и лосиони коишто содржат различни состојки наменети за разградување на мастите (кофеин, аминофилин, теофилин). Други содржат витамини, минерали и билни екстракти. Некои истражувања покажувале дека ретинол може да помогне за подобрување на изгледот на целулитот.

Третмани за коишто се препорачува консултација со професионално лице

Мезотерапија

Процедурата на инјектирање хемикалии во масниот слој под кожата за да се поттикне разградување на мастите се нарекува мезотерапија и вклучува хемикалии како фосфатидилхолин, аминофилин, хормони, билни екстракти, витамини и минерали. При оваа процедура постои ризик од инфекција, оток и осип на кожата, оттука е потребна консултатица со професионално лице.

Липосукција

Липосукцијата е процедура којашто се користи за отстранување на маснотии најчесто на бутовите, задникот и стомакот.