Од денеска ГОБ „8 Септември“ и модуларната болница на Инфективната клиника се отвораат за прием на нови ковид пациенти. Растот на бројот на позитивни пациенти и потребата од голем број хоспитализации повторно ги отвора вратите на веќе затворените, за оваа намена, болници.
Министерот за здравство Венко Филипче информира дека ваквата одлука е донесена утринава на состанок со директорите на клиниките.
– Она што е неопходно е проширување на капацитетите за прием на пациенти и за таа намена од денеска се ставаат во функција 8 Септември и модуларната болница на КИБФС. Во моментов се прави менаџирање на здравствен персонал според потребите на клиниките. Многу е битно да им помогнеме на медицинските лица при започнување на четвртиот епидемиолошки бран, а тоа можеме да го направиме единствено со вакцинација. Вакцините може значително да го успорат процесот на проширување на вирусот, да влијаат на исходот од болеста и затоа, бидете одговорни во овој процес. Потребно е што повеќе луѓе да бидат вакцинирани за да се постигне солиден колективен имунитет, информира Филипче.