ЕК: Социјалните лекции од оваа криза ќе бидат целосно одразени во нашите политики

Еврокомесарот за труд и социјални прашања Никола Шмит, по повод Први мај, порача дека Европската Комисија ги научи лекциите од кризата со Ковид-19 и вети дека ќе се гради „праведна,…

Еврокомесарот за труд и социјални прашања Никола Шмит, по повод Први мај, порача дека Европската Комисија ги научи лекциите од кризата со Ковид-19 и вети дека ќе се гради „праведна, силна и социјална“ Европа, јави дописничката на МИА од Брисел.

Шмит по повод Меѓународниот ден на работниците, Први мај, им се заблагодари на сите работници и професионалци кои директно помагаат во надминувањето на оваа криза – здравствените работници, касиерите, чистачите, и посебно жените кои се најбројни во овие клучни професии.

– Кризата нѐ присили сите колективно да размислиме за вредноста на професиите кои ни овозможуваат да останеме здрави и безбедни и оние кои носат храна на нашите маси. Нѐ научи дека ако сакаме да излеземе од овој тежок период со посилна економија и покохезивно општество, сега е времето кога треба да оствариме напредок во социјалните права, посебно кога станува збор за праведни плати, подобри услови за работа и гаранции за еднаквост на можностите за сите, напиша Шмит.

Тој потсетува на социјалните иницијативи на Европската Комисија преземени од почетокот на кризата како воведување фонд за помош на невработените и асистенција за најранливите категории граѓани.

-Наскоро Комисијата ќе излезе со сеопфатен план за закрепнување кој ќе ни овозможи да ги рестартираме нашите економии и да го вклучиме процесот на движење кон поотпорна, поодржлива и праведна Европа, нагласи комесарот.

За Шмит е од клучна важност ЕУ да се фокусира на справување со невработеноста во наредниот период, но и со озбезбедување високи здравствени стандарди на работните места за сите.

– Треба да се бориме против сиромаштијата и детската сиромаштија преку воведување детска гаранција, треба да се осигуриме дека сите работници, вклучително и оние на фронтот на оваа криза, имаат приход кој им овозможува пристоен стандард на живеење, затоа, со нашите социјални партнери ќе продолжиме да работиме на иницијативата за минимална плата и зајакнување на колективните договори, порача Никола Шмит, додавајќи дека граѓаните “можат да бидат сигурни дека лекциите научени во овие тешки времиња целосно ќе се одразат“ во предлозите на Европската Комисија.


Related Articles