На Кипар денеска се регистрирани и потврдени првите два случаи на заразени со коронавирусот, а според тамошните медиуми станува збор за 64-годишен доктор и 25-годишно момче.
Министерот за здравство на Кипар, Константинос Јоану, на денешната прес-конференција со новинарите ги соопшти случаите, со што Кипар влегува на листата земји во кои е потврден Ковид-19.
Јоану објаснил дека 64-годишниот маж, доктор во државна болница во Никозија, на 3 март се вратил од Англија и дури вчера пријавил дека има одредени симптоми, по што анализите биле позитивни.
Министерот за здравство коментирал дека тоа што задоцнил пет дена да ги извести надлежните ги отежнува обидите за пронаоѓање на контактите.
Во однос на вториот случај, момчето на 26 февруари се вратило од Милано, му била извршена проверка на аеродромот и било побарано да остане во домашна изолација, но и покрај тоа, втората проверка била позитивна.