Министерот за здравство Беким Сали денеска изјави дека очекува на утрешната владина седница да бидат изгласани препораките на Комисијата за заразни болести, која би требало да се одржи доколку се закаже состанок на Генералниот кризен штаб. Една од мерките која би требало да се ослободи, а за која се зборуваше минатата седмица е носењето маски на учениците во училиштата, посочи министерот.
Претходната епидемиолошка недела, појасни министерот, не е показател во каква епидемиолошка состојба сме, а врз основа на тие податоци одлучуваме за идната недела.
– Имаше точки кои ние ги донесовме како Комисија, но не избрзавме со гласање или преминување како одлука на Влада, затоа што состојбата во идната недела наложуваше дека можеби би можеле да се вратиме на претходната состојба. За да не излеземе несериозни, а одлуката на Влада е правосилна и треба да се имплементира во секојдневното функционирање на сите институции некогаш не избрзуваме со тоа што чекаме и следната недела како ќе постапиме, а потоа две одлуки ги поминуваме на Кризниот штаб, рече Сали, одговарајќи на новинарски прашања по означување на почетокот на караванот за вакцинација против КОВИД-19 во Шуто Оризари.
Тој посочи дека посакува да се ослободиме од маските, меѓутоа, како што додаде, реалната состојба не го вели тоа.
– Секој ден има од 250 до 300 новоинфицирани што значи се уште не сме на нивото што го посакуваме. Новоинфицираните ни се показател дека се уште вирусот кружи низ населението. Според податоците ние сме во зелена зона, но не сме се уште за симнување на маските, додаде Сали.