Децата не треба да се вакцинираат против Ковид-19 сè додека не се вакцинираат постарите лица и ризичните групи во сите земји, оцени денека Светската здравствена организација (СЗО). Кејт О’Брајан, директорот на одделот за имунизација и вакцинација на СЗО повтори дека приоритет е сите земји да добијат вакцина за високо ризични групи пред да се вакцинираат оние кои имаат многу помал ризик од зараза.

Предупредувањето доаѓа откако Канада во средата ги одобри вакцините на Фајзер/Бионтек за адолесценти од 12-годишна возраст па нагоре, со што стана првата земја што го стори тоа. Следната недела се очекува истото да го направат и САД, а Германија најави дека до крајот на август ќе им понуди вакцина на сите над 12 години.

Шефот на СЗО Тедрос Аданом Гебрејесус вчера ги повика богатите земји-членки на Г7 да дадат апсолутен приоритет на еднаквиот пристап до вакцините, нагласувајќи дека сегашната состојба е „неприфатлива“.

– Најважното нешто што сега ни треба се вакцините, рамноправност во вакцинацијата, рече тој, додавајќи дека пандемијата зема 100.000 животи неделно. Сите знаеме што треба да се стори за да се зголеми производствениот капацитет и со тоа имунизацијата во сите земји, рече шефот на СЗО.

Тој истакна дека „повеќе од 80 проценти од дозите на вакцини“ биле дадени во побогатите земји, додека најсиромашните примале само 0,3 проценти.

– Тоа е неприфатливо, ваквиот јаз е неприфатлив, заклучи Тедрос.