Викендов почнува зимското сметање на времето. Со поместување на часовникот за еден час наназад, од 31. октомври почнува зимското сметање на времето, со што времето во 3 часот ќе се смета како 2 часот.
Зимското сметање на времето почнува секој последен викенд во октомври и трае до последниот викенд во март следната година. Последните години во Европа, па и во земјава се води јавна дебата дали е потребно да дојде до прекин на сезонските промени на времето од зимско во летно и обратно.
Иако промената на времето е во принцип корисна за заштеда на енергија во текот на летото, очигледно има повеќе недостатоци отколку предности. Експертите за спиење тврдат дека луѓето потешко се прилагодуваат на летното, отколку на есенското поместување на часовниците, заради губењето еден час сон. Организмот многу полесно го поднесува преминот кон зимското сметање на времето, поради малку подолгиот сон.
Сепак дополнителниот час спиење при преминувањето на зимското сметање на времето, го добиваат само мал број лица. Многумина се будат порано, се будат неколку пати во текот на ноќта и имаат неквалитетен сон. Најголем проблем имаат лицата кои спијат помалку од седум часа.
Поместувањето на часовникот може да ја наруши хормоналната слика што предизвикува низа тегоби како што се мигрени, нервоза и депресија. Поради враќање на часовникот наназад, луѓето губат енергија и повеќе ги чувствуваат временските прилики.