Ние сме држава која е рекордер по бројот на труења со киселини. Нема ни една друга држава во Европа што има толку труења со киселини по глава на жител, истакна денеска во своето гостување на една од утринските емисии во македонскиот етер, проф. др. Ниќо Беќаровски од Универзитетската клиника за токсикологија.
Причината поради која д-р. Беќаровски зборуваше на оваа тема е последниот случај на труење, во кој битолчанец наместо вода испил концентрирано средство за садови. Здравствените работници велат дека момчето е во добра состојба и закрепнува, но она што загрижува е што во земјава се регистрираат голем број случаи на труење со медикаменти. Сепак алармот се вклучува и на случаите со свесно труење со киселини за што земјава е рекордер во Европа, открива д-р Беќаровски.
– Најголем дел се сепак труења со медикаменти, пред сè со лекови за смирување, тука доминира „диазепамот“. Но, тоа што би сакал да истакнам, зошто е крајно алармантно, ние сме држава која е рекордер по бројот на труења со киселини. Нема ни една друга држава во Европа што има толку труења со киселини по глава на жител. Зборуваме за свесни труења, како обид за самоубиства. Можете да замислите кој е очајот за да посегнете и да си го одземете животот со корозивно средство, потенцираше Беќаровски.