Жените генерално имаат повисока заштита од корона вирусот отколку мажите откако ја добиле втората доза од вакцината на „Фајзер/Бионтек“, според студијата објавена во средата – иако имунитетот кај двата пола има тенденција да ослабне во рок од неколку месеци по целосната вакцинација.

Студијата, објавена во New England Journal of Medicine, исто така, сугерира дека луѓето на возраст од 18 до 45 години имале посилен имунитет од оние над 65 години, откако ја примиле втората доза. Повеќе од 4.800 вакцинирани здравствени работници во Израел учествуваа во студијата од декември до јули, додека земјата спроведуваше едно од првите масовни вакцинации во светот.

Додека вакцините против корона вирусот остануваат ефикасни во спречувањето на хоспитализациите, студијата додава тежина на гласовите што повикуваат да се понудат трети дози за пошироката популација.