Екипата на Црвениот Крст од Охрид на својата фејсбук страна извести дека денес по барање на Директорката на Здравствен дом Охрид беше повикана да помага во процесот на масовната вакцинација. Но откако започнала вакцинацијата во рамките на салата „Билјанини извори“ тие биле грубо избркани.
Во продолжение ви го пренесуваме нивното фејсбук известување во целост:
-Со жалење и неверување Ве известуваме дека денес, 04.05.2021 г., во 8 ч. екипата на Црвен крст Охрид која на барање на Директорката на Здравствен дом Охрид беше повикана да помага во процесот на масовна вакцинација во спортската сала Билјанини извори, беше грубо избркана од страна на Сашо Денесовски, т.н. координатор на спроведување на масовната вакцинација во Охрид. За жал и овој пат личните комплекси и фрустрации на една личност победуваат пред потребите за асистенција и помош на лицата кои се вакцинираат и на олеснување на административната работата на оние кои се вклучени да го спроведуват вакциналниот процес, што е активност на волонтерите на Црвениот крст во сите земји во светот каде се спроведува масовна вакцинација против Ковид-19, објави Црвениот крст Охрид.
Од Црвениот крст велат дека нивните волонтери остануваат подготвени доколку има потреба да продолжат во помагање и олеснување на процесот на вакцинација против Ковид-19 на вакциналниот пункт на Здравствен дом Охрид во Општата болница Охрид.
