Во Центарот за здравје Куманово, евидентирани се уште два нови случаи на пертусис, соопштија надлежните од установата.
– Во текот на вчерашниот ден, стигнати се пријави за два случаи на пертусис, потврдени лабораторски во микробилошката лабораторија на нашиот центар. Двата се случаи се од градот Куманово. Едното е петмесечно доенче, вакцинирано со една доза, хоспитализирано во Козле и еден 20-годишник кој е целосно вакциниран со пет дози и е на домашно лекување – изјави доктор Едита Рамизи, епеидемилог од Центарот за јавно здравје Куманово.
Заклучно со 18 март на подрачје на Центарот што ги опфаќа општините од североистокот на Македонија има регистрирани 10 случаи, 9 во Куманово и 1 во Крива Паланка.
Од вакциналниот пункт на Здравствен дом Куманово информираат дека од средината на јануари досега со ДиТеПер вакцина имунизирани се 1.260 деца. Посебно интерес за вакцинација пројавиле родителите на деца кои посетуваат градинка.
Покрај ДиТеПер, расте интересот и за МРП вакцина, бидејќи веќе во регионот и соседните држави има заболени од морбили. Кумановските лекари препорачуваат целосна вакцинација, зашто пертусис е втора по морбили контагиозна болест која не ги штеди помалите, ниту повозрасните и повикаа и родителите детално да ги проверат вакциналните картони.