Ако планирате да станете мајка, морате да знаете што всушност претставува овулацијата. Од друга страна, пак, ако сакате да се заштитите од несакана бременост, исто важно е да знаете нешто повеќе за вашата овулација.
Во продолжение прочитате ги најважните работи за овулацијата што секоја жена би требало да ги знае:
Што претставува овулацијата?
Овулацијата е дел од менструалниот циклус, односно период кога јајникот испушта зрела јајце клетка, која чека да биде оплодена.
Откако ќе се оплоди, јајце клетката се движи кон матката, каде што се вгнездува и започнува бременоста.
Бременоста кај луѓето, броејќи од првиот ден од последната менструација, трае 10 лунарни месеци (месец со 28 денови). Односно, бременоста трае околу 9 календарски месеци.
Ако испуштената јајце клетка не се оплоди, почнува процес на исфрлање на слузта од матката преку крвавење.
Ова крвавење е всушност вашата менструација.
Кога настанува овулацијата?
Овулацијата најчесто настанува околу 14-тиот ден од 28-дневен циклус. Бидејќи секоја жена има различен циклус, точното време на овулација може да варира.
Воглавно, овулацијата настанува четири дена пред или четири дена после средината на циклусот.
Важно е да знаете дека втората фаза од циклусот (после овулација) е фиксна и трае од 12 до 14 денови. Првата фаза може да варира.
Колку долго трае овулацијата?
Овулацијата започнува со лачење на хормон што ги стимулира фоликулите. Овој хормон се лачи помеѓу 6-тиот и 14-тиот ден од циклусот и ѝ помага на јајце клетката да созрее.
Штом ќе созрее јајце клетката, јајникот лачи хормон кој го поттикнува нејзиното ослободување.
Овулацијата може да настане во рок од 28 до 36 часа после лачењето на овој хормон.
Кои се симптомите на овулација?
Овулацијата може да предизвика промени во вагиналниот исцедок и создавањето слуз на грлото на матката.
Најчесто ова е провиден и еластичен исцедок, а може да има и бела боја.
После овулацијата, вагиналниот исцедок може да биде погуст и да има изразено бела боја.
Некои од симптомите што се појавуваат за време на овулација се:
– Мало крвавење
– Чувствителни гради
– Зголемен сексуален нагон
– Болка и неудобност во јајниците или едната страна од стомакот.
Како се вклопува овулацијата во менструалниот циклус
Менструалниот циклус започнува на денот кога започнува крвавењето. Како што веќе напоменавме, овулацијата настанува околу 14-тиот ден од циклусот.
После овулацијата настапува лутеинска фаза, која трае до почетокот на следната менструација.
Можно ли е да настанат повеќе овулации во еден циклус?
Некои жени можат да овулираат повеќе пати во текот на еден циклус.
Едно истражување од 2013-та година покажало дека овулацијата може да се појави 2 или 3 пати во еден менструален циклус.
Исто така, може да се случи да се ослободат повеќе јајце клетки во текот на една овулација. Ако и двете јајце клетки се оплодени, жената може да роди близнаци.
Дали овулацијата е единствениот период кога жената може да остане бремена?
Одговорот на ова прашање е не. Иако јајце клетката може да биде оплодена само 12 до 24 часа после испуштањето, спермата може да „преживее“ и до 5 дена во репродуктивниот канал.
Ова значи дека ако имате однос во деновите околу овулацијата, можете да останете бремени.
Што претставува „плодниот прозорец“?
Ова е период од 6 дена околу овулацијата, односно период кога можете да останете бремени.
После односот, спермата може да остане неколку дена во јајцеводите, и да ја оплоди јајце клетката за време на овулација.
Штом јајце клетката ќе стигне до јајцеводите, таму останува 24 часа. Потоа овој „плоден прозорец“ се затвора.
Можете ли да ја следите овулацијата?
Најточни резултати ќе добиете кај гинеколог. Сепак можете да ја следите овулацијата и во вашиот дом.
Следење на базалната телесна температура
Во овој случај станува збор за мерење на телесната температура при мирување. Треба да ја мерите температурата секое утро во текот на циклусот, за да можете да забележите промени.
За време на овулација, може да настане благ пораст на телесната температура.
Тестови за овулација
Во аптека можете да најдете тест за овулација кој го следи нивото на хормони во вашата урина.
Колку често треба да имате односи ако сакате да останете бремени?
Доволно е да имате секс само еднаш во плодниот период за да останете бремени. Паровите кои активно работат на тоа, можат да ги зголемат шансите за бременост ако имаат секс секој ден во текот на тој период.
Најдобриот период да останете бремени е два дена пред овулацијата или на самиот ден.
Што ако не сакате да забремените?
Ако не сакате да останете бремени, во текот на плодните денови користете заштита. Можете да употребувате кондоми, а можете да го прашате вашиот гинеколог за други контрацепциски средства.
Што се случува кога јајце клетката ќе се оплоди?
Кога ќе настане оплодување, започнува процесот на делење на јајце клетката на два, на четири, на шест дела, сè додека не стане бластоциста со 100 клетки.
Бластоцистата треба да се вгнезди во матката за да настане бременост.
Што ако јајце клетката не е оплодена?
Во овој случај, хормоните му сигнализираат на телото да ја исфрли јајце клетката, заедно со слузта од матката, со што започнува менструацијата.
Што ако овулацијата е нередовна?
Ако ја следите вашата овулација, можеби ќе забележите дека не е редовна. Во овој случај најдобро е да се консултирате со гинеколог.
Најчесто причината за ова е стрес или лоша исхрана, но сепак постојат и медицински состојби, како полицистични јајници, кои имаат влијание врз овулацијата.
Зошто е важно да разговарате со лекар?
Доколку сакате да останете бремени, најдобро е да разговарате со вашиот гинеколог.
Тој најдобро ќе ви го објасни процесот на овулација и ќе ви одговори на сите прашања.