„Општата перцепција е дека пробиотиците го прават цревниот микробиом поздрав. Но, иако се потребни повеќе истражувања, нашите податоци сугерираат дека можеби ова не е случајот кај пациентите со рак“.
Имунотерапијата е биолошка терапија за рак којашто делува во насока на подобрување на функцијата на имунолошкиот систем, односно на поттикнувње на имунолошкиот систем да се бори против болеста. Имунотерапијата како третман за ракот е релативно млада област, која, сепак, може да има потенцијал за долготрајно ублажување на симптомите од рак.
Според „Cancer Research Institute“, научниците досега покажале дека имунотерапијата е ефикасна во лекувањето на канцери кои се отпорни на хемотерапија и радиотерапија.
Инхибиторите на имунолошките места на контрола или т.н. „checkpoint инхибитори“ се еден вид имунотерапија. Тие влијаат на способноста на клетките на ракот да ги избегнат нападите на имунолошкиот систем. Сепак, тие се покажале како ефективни само кај 20-30 отсто од луѓето со рак.
Оттаму, подобрувањето на ефикасноста на имунотерапијата е од витално значење во третирањето на ракот. Група истражувачи од „Parker Institute for Cancer Immunotherapy“ во Сан Франциско, Калифорнија, и „University of Texas MD Anderson Cancer Center“ во Хјустон спроведоа студија во која го проучувале цревниот микробиом кој содржи трилиони цревни микроорганизми. Тие испитувале дали и како цревниот микробиом може да влијае на успехот на имунотерапијата. Оваа студија е прва што ја разгледува врската помеѓу имунотерапијата, цревниот микробиом и исхраната кај луѓето со рак.
Вкупно 113 учесници со метастатски меланом кои започнале со лекување во „University of Texas MD Anderson Cancer Center“ учествувале во истражувањето. Тие биле анкетирани за својот животен стил, односно начинот на исхрана и употребата на лекови и суплементи. Истражувачите, исто така, ги анализирале нивните фекални примероци за да изградат слика за секој микробиом од цревата на испитаниците. Тие, исто така, го следеле напредокот на третманот со имунотерапија кај учесниците.
Еден изненадувачки наод излегол на виделина – консумацијата на пробиотски додатоци корелирала со 70 отсто помала шанса да се реагира на имунотерапија со „checkpoint инхибитори“. Од учесниците во студијата, речиси половина, односно 42 отсто, изјавиле дека консумираат пробиотски додатоци. Истражувачите, исто така, забележале врска помеѓу пробиотиците и пониската разновидност на цревниот микробиом.
„Општата перцепција е дека пробиотиците го прават цревниот микробиом поздрав. Но, иако се потребни повеќе истражувања, нашите податоци сугерираат дека можеби ова не е случајот кај пациентите со рак“, изјави авторката на студијата Кристин Спенсер којашто е научен истражувач на „Parker Institute for Cancer Immunotherapy“.
Во истражувањето се покажало, исто така, дека начинот на исхрана имал влијание врз третманот со имунотерапија, односно, луѓето кои консумирале храна богата со растителни влакна имале пет пати поголеми шанси да одговорат позитивно на имунотерапијата. Студијата делумно може да објасни зошто некои видови на рак не реагираат добро на имунотерапија. Исто така, сугерира дека одредени фактори во исхраната може да имаат влијание врз стапките на успех на третманот.
Тимот признава дека подобрувањето на ефективноста на имунотерапијата можеби и не е толку едноставно, сепак, оваа студија укажува на тип на исхрана која може да има улога во имунотерапискиот одговор преку цревниот микробиом и тие се надеваат дека овие наоди ќе поттикнат повеќе студии на оваа тема во заедницата за истражување на ракот.
преземено од http://pharmanews.mk/