Денешната газирана минерална вода се добива со вбризгување на јаглерод диоксид во природна минерална вода, што и дава карактеристични освежителни меури.
Освен обична минерална вода, денес можеме да купиме газирана вода во различни вкусови, со или без шеќер или со засладувачи, а на многумина им стана омилен пијалок кој го пијат секојдневно. Но, дали е безбедно да се пие минерална вода секој ден, кои се нејзините придобивки и кој треба да ја избегнува?
„Природната газирана минерална вода содржи електролити како што се натриум, калиум, калциум и магнезиум. Се работи всушност за минерали кои растворени во вода стануваат јони и учествуваат во одржувањето на балансот на течности во нашето тело“, објаснува Петра Слишко, нутриционист, додавајќи дека овој напиток содржи и други јони како хлорид, флуор, сулфат и водород карбонат.
Бидејќи го хидрира телото на ист начин како и обичната вода, таа е одличен избор за топли денови или вежбање кога многу се потиме. Ако испиете чаша вода полна со меурчиња, можете да го намалите чувството на глад. Исто така, оваа вода заедно со влакната е клучна состојка за здраво варење, пренесува Данас.
Кој треба да внимава или да избегнува минерална вода?
„Потрошувачката на газирана минерална вода бара претпазливост при одредени состојби и болести“, забележува Слишко и продолжува: „Така, во случај на камења во бубрезите кои настанале со акумулација на калциум фосфат или карбонат, се советува да се избегнуваат газирани пијалоци, додека лицата со кардиоваскуларни или хронични бубрежни заболувања треба да земаат минерални пијалоци во ограничени количини токму поради присуството на споменатите минерали, чиешто внесување треба да се контролира и модифицира со диета“.
Треба да внимаваат и луѓето кои имаат проблеми со дигестивниот систем.
Газираните пијалоци исто така може да предизвикаат надуеност или да ги влошат симптомите на одредени дигестивни состојби како што се воспалителна болест на цревата, ГЕРБ и гастритис, објаснува Петра и додава:
„Доколку сакате да знаете дали потрошувачката на газирана минерална вода се смета за безбедна во вашиот случај и во која количина, консултирајте се со експерт“, заклучи таа.