Денеска во Сиднеј и другите австралиски градови илјадници луѓе се собраа во знак на протест против рестриктивните мерки воведени поради зголемиот број новозаразени. Демонстрантите, без маски на лицата, прошетаа од паркот „Викторија“ до градското собрание во центарот, носејќи пароли на кои беше испишано „Слобода“ и „Вистина“.

Забележливо е големото присуство на полицијата и припадниците на специјалните единици, бидејќи надлежните велат дека станува збор за незаконски протестни активности. Полицијата уапси неколку лица откако демонстрантите ги пробија бариерите и фрлаа пластични шишиња и други предмети кон полицијата. Полицијата на Нов Јужен Велс соопшти дека го признава и поддржува правото на слобода на говор и мирно собирање, но дека протестот претставува кршење на одредбите за јавно здравје.

Во последните 24 часа, во оваа земја се регистрирани 163 нови случаи на коронавирус. Нови рестриктивни мерки се воведени на пошироката територија на Сиднеј и траат веќе четири недели. Протести имаше и во Мелбурн, каде илјадници демонстранти извикуваа „слобода“.