Иако можеби веќе ви е преку глава од „лековите“ за анксиозност што ви ги предлагаат сите, важно е да сфатите нешто – малите промени во секојдневните навики навистина можат да ви помогнат да ја контролирате анксиозноста.
Ова, се разбира, не е магичен лек што веднаш ќе направи да исчезнат сите ваши проблеми. Но, добро е да знаете дека не сте беспомошни во вашата битка.
Истовремено, имајте на ум дека она што функционира за една личност, не значи дека и вам ќе ви биде од корист, но не значи и дека за вас нема надеж.
Неколку луѓе кои страдаат од анксиозност решиле да споделат кои мали промени навистина им помогнале, а вие можете да одберете што е најдоброто за вас:
Секое утро местете си го креветот
„Секое утро си го местам креветот. На овој начин уште на почетокот од денот се чувствувам како да сум направил нешто. Покрај тоа, колку и да бил стресен денот, кога ќе се вратам дома не ме пречекува неред.“
Подесете го телефонот на нечујно
„Воопшто не сфаќав дека неочекуваните пораки и повици ми предизвикуваат анксиозност. Па, го подесив телефонот на нечујно.“
Разговарајте со другите за вашата анксиозност
„Почнав отворено да разговарам со блиските за мојата анксиозност. Кога ми е навистина лошо разговарам за тоа, наместо да го кријам.“
Ограничете го времето на социјалните мрежи
„Го ограничив времето поминато на социјалните мрежи. Ми изгледаше како анксиозноста да ми се влошува секогаш кога ги користев бидејќи постојано се споредував со другите. Ова имаше големо влијание врз мојата самодоверба.“
Слободно кажете „Не“
„Почнав да бидам искрен и да ги одбивам другите. Кога не сакам да направам нешто, го кажувам тоа. Сакам да им помогнам на другите, но и јас имам граници.“
Користете техники од когнитивна бихевиорална терапија
„Почнав да ги користам техниките од терапија. Најпрво се обидувам објективно да размислам за изминатиот ден. Размислувам што ми се случило и потоа ги оценувам настаните. Но, за да можам да оценам некој настан, треба да си дадам ’докази‘. Бидејќи анксиозноста сака да ме убеди дека сум имал лош ден, се обидувам да се фокусирам на позитивните страни и на постигнатите резултати. Најчесто ова ми помага да сфатам дека всушност сум имал добар и продуктивен ден.“
Јога и медитација
„Јогата и медитацијата се незаменливи! Токму ова ми помага да останам присутна во сегашниот момент. Ми помага да останам приземјена и да не ѝ дозволам на анксиозноста да ме надвладее.“
Направете распоред или листа со обврски
„Имам планер, но користам и потсетници и апликација на мојот телефон која има охрабрувачки пораки. Ова е најдоброто нешто што сум го направил за мојата анксиозност.“
Вежбајте
„Почнав да одам во теретана. Најмногу ја користам лентата за трчање и статичните велосипеди. Едноставни и бавни вежби. Вежбам рано наутро, а ако во текот на денот почувствувам анксиозност, пешачењето или трчањето во место ми помагаат.“
Прифатете ја анксиозноста
„Успеав да го прифатам овој дел од мене, да ја прифатам мојата анксиозност. Ова ми помага да се ослободам од чувството на вина. Можеби не се ослободив од анксиозноста, но барем не се чувствувам виновна што ја имам.“
Отстранете ги токсичните луѓе од вашиот живот
„Ги отстранив сите токсични луѓе од мојот живот. Престанав да ги следам и новостите на политичките страници на Facebook и Twitter. Животот е многу подобар откако сум малку себичен и најпрво мислам на моите потреби. Колку злобно и да звучам, многу подобро се грижам за себе и за саканите откако се ослободив од некои луѓе.“
Направете рутина за спиење
„Си направив рутина за пред спиење. Можеби звучи смешно, но откако ќе се измијам заби, си ги мијам рацете со сапун од лаванда. Потоа си легнувам, го вдишувам мирисот од сапунот и си кажувам дека сум безбеден, физички, ментално и емоционално. Ова навистина ми помага.“
Водете дневник
„Кога ќе почнам да се чувствувам лошо, почнувам да пишувам во дневникот што се случило. Ова ми помага да откријам која е причината за мојата анксиозност и да најдам начин да се справам.“
Правете нешто со вашите раце
„Почнав насекаде да го носам гобленот што го везам. Ова ми помага кога и седам и разговарам со другите. Дури и ако не разговарам со некој, везењето ми помага да ја намалам напнатоста.“
Намалете со кофеинот
„Престанав да пијам кафе. Најчесто пијам билни чаеви, а одвреме-навреме пијам и бескофеинско кафе. Откако ја направив оваа промена, паничните напади се намалија.“
Станете порано и подгответе се за денот
„Почнав да станувам порано, за наутро да имам време да се подготвам за денот. Ова направи огромна разлика и имам време да си ги средам мислите пред да излезам од дома.“
Покажете благодарност
„Почнав да запишувам по три работи за коишто сум благодарна секој ден. Потоа одам на прошетка.“