Состојбата со коронавирусот ескалира. Се зголемува бројот на починати и заразени, а власта ја теши јавноста дека ова не е најлошото туку пикот наскоро ќе дојде. Наместо Владата соодветно да се справува со ситуацијата, граѓаните се сведоци на задоцнети мерки, соопштуваат од ВМРО-ДПМНЕ.

Од партијата велат дека нема ниту масовно тестирање, ниту соодветна заштита на медицинскиот персонал, ниту соодветна грижа за загрозените категории граѓани, а економијата е целосно запоставена.

-Од првиот ден кога се појави заразата во Македонија, ВМРО-ДПМНЕ предлага конкретни мерки и чекори со кои што треба да се спречи нејзиното натамошно ширење и потешки последици врз економијата и стопанството, но за суетата на малкумина ќе плаќаат илјадници македонски граѓани. Она што најмногу загрижува е анализата на меѓународната организација ФМ Глобал според чија проценка, Македонија ќе биде една од последните држави која ќе закрепне од пандемијата. Од анализирани 130 земји, Македонија е на дното односно на катастрофалната 100-тата позиција. Од регионот пред нас се држави како Хрватска на 37 место, Србија на 63-то место, Босна и Херцеговина на 70-то место. Ова е потврда за сето она на кое што ВМРО-ДПМНЕ предупредува со недели. Неспособноста, расипништвото и суетата на власта скапо ќе ја чинат Република Македонија. Додека Владата на СДСМ и „портпаролот“ на министерството за здравство Венко Филипче се фалат со своите успеси упатувајќи ги граѓаните да се лекуваат дома од опасниот корона вирус, пациентите умираат на пат кон болница, се наведува во соопштенито.

Потребни се итни мерки за спас на здравствениот систем од колапс, за спас на економијата за спас на Република Македонија. Македонија повеќе нема време за чекање.