Влатко Ѓорчев, член на Извршниот Комитет на ВМРО-ДПМНЕ, на денешната прес конференција посочи дека Македонија се соочува со најмногу починати од Ковид-19, а се уште во многу македонски градови нема вакцинални пунктови. Прилеп со 414 починати нема вакцинален пункт, а во меѓувреме во регионот во секое село и општина се отвораат вакцинални пунктови. Македонија крахира со со процесот на вакцинација, истакнува Ѓорчев.
Во продолжение го пренесуваме интегралниот текст од одржаната прес-конференција на членот на ИК на ВМРО-ДПМНЕ, Влатко Ѓорчев:
– Со месеци Македонија беше земја во која што имаше најмалку вакцини, а најмногу починати од КОВИД пандемијата. Сега кога почна вакцинацијата има огромен број на градови и општини во кои што не се одвива вакцинацијата односно нема вакцинални пунктови, реагира Владимир Ѓорчев, член на ИК на ВМРО-ДПМНЕ.
– Во Прилеп со 414 мртви се уште нема вакцинален пункт. Струмица со 200 мртви исто така нема вакцинален пункт. Иста е и ситуацијата и во Гевгелија, Крива Паланка, Валандово, Берово, Пехчево, Делчево, Кочани, Гостивар, Кичево, Дебар, Струга и во многу други места.
– Оваа неспособна власт требаше веќе да има отворено вакцинални пунктови во сите овие општини, за да им биде тоа подостапно на граѓаните. Во време каде што балканските земји во секој град, и во секоја општина, некаде дури и во речиси секое село се отвора вакцинален пункт, за жал Македонија крахира со процесот на вакцинација, а граѓаните и народот тоа го плаќаат со изгубени животи. Одговорност мора да има! Ова е катастрофа на Зоран Заев и Венко Филипче, а цената ја плаќа народот“ – порача тој!