Коронавирусот кој се прошири низ целиот свет можеби првиот пат бил пренесен на луѓето во јужна Кина, а не во градот Вухан кој се смета како изворот на заразата. Тоа го покажала новата студија која се спротивставува со нашироко прифатените теории за потеклото на пандемијата.
Мапирајќи ја „мрежата“ на геномите на коронавирусот и следејќи ги мутациите за тоа време, тим на истражувачи предводени од генетичарите од Универзитетот Кембриџ утврдиле дека првата инфекција од Ковид-19 можеби се случила уште во септември, во регион јужно од Вухан. Во студијата се нагласува дека човекот можел да го носи патогенот многу време пред тој да мутира во смртоносниот облик.
– Вирусот можеби пред неколку месеци мутираше во конечниот облик, но останал во лилјакот или друго животно, па дури и во човекот неколку месеци, без да инфицира други поединци, изјавил генетичарот Питер Форстер за „Саут Чајна морнинг пост“.
Како што се наведува, вирусот почнал да се шири меѓу луѓето некаде помеѓу 13 септември и 7 декември, создавајќи мрежа која е претставена во студијата. Иако се верува дека вирусот преминал од лилјак на друго животно, па потоа на луѓето, новите истражувања би можеле да ги поништат главните идеи. Првобитните теории покажаа дека пренесувањето на вирусот врз луѓето се случило на пазарот во Вухан, но новата студија го донесе тоа во прашање, сугерирајќи дека Ковид-19 потекнува јужно од кинескиот град.
– Ако морам да дадам одговор, би рекол дека вирусот почна да се шири од југот во Кина, а не од Вухан, наведе Форстер.
Во меѓувреме неколку водечки американски медиуми оваа недела се занимаваа со темата дека вирусот можеби излегол од лабораторијата за вирусологија во Вухан. Иако претседателот на САД не го усвои тоа тврдење официјално, рече дека Белата куќа размислува за таа идеја, додека истовремено го обвини Пекинг за глобалната здравствена криза.