Вакциналните центри со одлука од министерството ќе вакцинираат и 6 месечни бебиња со МРП

Во критична состојба се четири деца заразени со морбили. Три се на лекување на Инфективна, а едно е на Детска.

Меѓу пациентите на Клиниката за инфективни болести има и детенце со Церебрална парализа и епилепсија кај кого вирусот предизвикал сериозни компликации.

Трите смртни случаи од компликации од морбили за три дена ги исплашија родителите. Само до пладне во пунктовите на имунизација во Скопје МРП примиле 214 деца. Целата ситуација со епидемијата и декларациите со изминат рок на дел од вакцините кај скопјанецот Горан Коцевски предизвикале дополнителна забуна. По долго размислување денеска со сопругата дојдоа во Поликлиниката Јане Сандански за нивното двегодишно дете да го вакцинираат против морбили.

Иако вчера комисијата за заразни болести препорача имунизација со МРП за сите бебиња над шест месечна возраст денеска во Пунктовите не ја спроведуваа мерката бидејќи ја чекаат на писмено одлуката од министерството за здравство.

Од Здравствен дом Скопје ќе бараат дополнителни тимови за спроведување на најавената теренска вакцинација во училиштата, за да не останата пунктовите без медицински кадар. Но категорични се дека нема да биде боцнато ниту едно дете без дозвола од родителите.