Женското бебе кое синоќа било оставено пред влезот на битолскиот Дом за доенчиња не било родено во битолската болница, потврдија од Центарот за социјални работи од Битола. МВР веќе соопшти дека бебето на возраст од околу една недела било оставено пред влезот на Домот за доенчиња во Битола, а синоќа околу 23,45 часот го пронашол битолчанецот З. Б. (50) и случајот го пријавил во полиција.
По пријавата, полицијата заедно со надлежни лица од Центарот за социјални работи бебето го однеле на Одделението за неонатологија во битолската Болница.
„Таму беше утврдено дека се работи за пресно породување и според нараквицата на раката утврдено е дека бебето не било родено во битолската болница“, рече Томе Цветковски, директор на Центарот за социјални работи во Битола.
Пред да се најде бебето, поголема група луѓе биле собрани пред Домот и тропале по вратата. Вработените повикале полиција и кога таа дошла надвор имало само еден маж кој рекол дека го пронашол бебето пред влезот на Домот.
Бебето е згрижено во Домот за доенчиња. Кој го оставил и зошто треба да покаже истрагата на надлежните институции.